شروط الاستعمال

آخر تحديث: أكتوبر 2026

مرحبا بيك في موقع Logicia Solutions. كي تستعمل الموقع ولا تعدّي طلبية، معناها قريت الشروط هاذي وموافق عليها. كتبناها ببساطة باش تعرف حقوقك وواجباتك.

1. شكون أحنا

Logicia Solutions شركة تونسية مقرّها في صفاقس، مختصة في البرمجيات للتجّار وأصحاب المشاريع. منتوجنا الأول هو Caissty، نظام كاسة لتسيير الحانوت.

2. الطلبية والخلاص

تعدّي الطلبية من الفورميلار في الموقع (الاسم، التليفون والعنوان).
فريقنا يكلّمك باش يأكّد الطلبية قبل ما نبعثوها. كان ما نجمناش نوصلولك، الطلبية تنجم تتلغى.
الخلاص عند الاستلام (كاش للّي يوصّلك)، بالدينار التونسي.
الأسوام المكتوبة في الموقع هي المعمول بيها نهار الطلبية. ما فماش حتى اشتراك شهري ولا مصاريف مخبّية.

3. التوصيل

نوصّلو لكامل ولايات تونس عن طريق شركة توصيل.
مدّة التوصيل عادة بين 24 و72 ساعة بعد التأكيد، وتنجم تتأخّر شوية حسب المنطقة.
كي يجيك الليفرور، ثبّت في العلبة قبل ما تخلّص.

4. الترخيص (Licence)

كي تشري Caissty، تاخو ترخيص استعمال لحانوت وحدة، موش ملكية البرنامج.
ممنوع تنسخ البرنامج، تبيعو، تكريه، تعطيه لحد آخر ولا تحاول تفكّو ولا تبدّل فيه.
كود التفعيل شخصي ومربوط بالطلبية متاعك.
كان فما خرق لهالشروط، من حقّنا نوقّفو الترخيص من غير ما نرجّعو الفلوس.

5. الدعم الفني والتكوين

مع كل نسخة: دورة تدريبية بالفيديو ودعم فني بالتليفون والواتساب على 55 035 484.
الدعم يعاونك في التركيب والاستعمال العادي للبرنامج. ما يشملش تصليح الأورديناتور ولا الماتريال متاعك.

6. الضمان والإرجاع

عندك ضمان 30 يوم. الشروط الكل مفسّرة في سياسة الإرجاع.

7. مسؤوليتك ومسؤوليتنا

انت مسؤول على المعطيات اللي تدخّلها في البرنامج، وعلى إنك تعمل نسخة احتياطية (sauvegarde) بصفة منتظمة.
Caissty أداة تعاونك تنظّم خدمتك، أما ما تعوّضش المحاسب ولا الواجبات الجبائية متاعك.
ما نتحمّلوش المسؤولية على خساير جات من استعمال غالط، مشكل في الأورديناتور، انقطاع الضو ولا الأنترنيت، ولا حاجة خارجة على يدّنا.
في كل الحالات، المسؤولية متاعنا ما تفوتش الثمن اللي خلّصتو في المنتوج.

8. الملكية الفكرية

البرنامج، الاسم Caissty، اللوغو، الفيديوهات ومحتوى الموقع الكل ملك لـ Logicia Solutions. ممنوع تستعملهم من غير إذن كتابي.

9. تبديل الشروط

ننجمو نحدّثو الشروط هاذي من وقت لآخر. النسخة المنشورة في الموقع هي المعمول بيها، والطلبيات اللي تعدّات قبل التبديل تبقى بالشروط القديمة.

10. القانون المعمول بيه

الشروط هاذي تخضع للقانون التونسي. كان صار خلاف، نحاولو نحلّوه بالتفاهم الأول، وإلا يرجع النظر للمحاكم.

📞 تواصل معانا

التليفون: 55 035 484
العنوان: صفاقس، تونس